Psa 91 | MMX | STEP | Nege di do dit kis sogo at Leeme Silok, dik lox asepsu at levenaniu, la nedi do dik lok maxopok at loklox aratao at Lanaraavuk,

Psalms 91

Moroa Lentupe Atnedik

1 Nege di do dit kis sogo at Leeme Silok, dik lox asepsu at levenaniu, la nedi do dik lok maxopok at loklox aratao at Lanaraavuk, 2 di epovo xusu dina tong i rin keretna, “Nenu lentupe atnema la Lurutu See Pe atnema. Nenu ne Moroa atnema; la ma nuunu saga ram.” 3 Neni naba lox asepsu nimi basinge levempanga sepsep mo ik lox alipe la basinge bok levenanmeres sepsev amet. 4 Neni naba kok nimi mi luvapa ren; la minabak lox avukat keneng at loklok tatao ren; luruturun teren naba lok tatao la na tu banpe nimi. 5 Mi noxo marat at tepanga sepsep at laxanimin kopla tepanga longlong arakdu ru at laxangking, 6 kopla tevenanmeres kapmek na lutpot at laxanimin kopla mo lubunggas kapmek ip sep at lengkangking.

7 Tegesa abin sangaun kobot giba met mun go saparap nimi, la legesa sangaun larabin sangaun kobot go xangkan nimi, ketla dixo epovo ba ri lok kapmek tekot atnimi. 8 Minabak milik kaxat la mina reven ba i mo limixin kapmek dik lok ka levesongsongot kuren.

9 Mira siam ka vam Leeme Silok i ngan Lentupe rinimi. Mo Leeme Avolo i ngan Lurutu See Pe rinimi; 10 kuren la ba xopmen bok ba tumumuat naba sak pava nimi, la tempanga loklox asongot nat pot saparap laraugu aulis atnimi. 11 Moroa naba lok li lubungangelo ren kusu dinabak lok tatao nimi, la kusu dinaba kok nimi at levengkot axap minat pas teren. 12 Dinaba rebeng aurut nimi mi lengkikngen di xusu mi noxo lox asongot lengkangkedek atnimi ro at laxanuat. 13 Minabat pas povorok asi lempat laion mi lempat sii, mo lempat laion atat la lempat sii mamao.

14 Moroa i vaase xeretna, “Anaba lox asepsu nedi di balamu ia la anaba xok nedi ua di ven kibis ia do nenia Leeme Silok. 15 At loxonaleng dina ngising tia, anaba ronga res atnedi. Do dina ekip tangarang mi levenmumuat, anbak lok eburu midi kusu ri lok tooro di; anaba lox asepmus nedi basinge mo levenmumuatla ana xip aurut levenasen atdi. 16 Anaba un di mi lorooro abao; la anabak lox asepmus nedi at levenmumuat.”